Besöök per Rad

Wat hebbt wi uns in´t LzN freit! Bremer Besöök ut Pusdörp hett sik anmellt. En Grupp vun bummelig 20 Schölerinnen un Schöler hett sik per Rad un Bus vun de annere Weserkant op den Weg maakt un wull maal wat op Platt beleven. Keen Probleem! Wöörböker un Stempel kemen mit Papeertüten to Disch. So kunnen de Schöler ut den Jahrgang 7 glieks dat Schrieven anfangen:

Twee Stünnen lang hebbt se plattdüütsche Wöör söcht, funnen un op de Tüten stempelt. Vele Fragen kemem op:
Snackt Ji hier bloots Platt in`t LzN?
Antwoort: “Ja!”
Oder:Wat weer hier in Bremen toeerst? Hoochdüütsch oder Plattdüütsch?
Antwoort:”Plattdüütsch”!

Na den groten Tütendruck güng dat wieder mit Bookstavenperlen. De mit Platt anfangen deit, hett gau Lust op mehr! So geev dat Slötelanhänger op Platt. “Bumfiedel” weer dor to lesen oder “Moin” mit en Vörnaam.

De twee Stünnen güngen rüm as nix un wi sünd na Pusdörp inlaadt worden – en Gegenbesöök mit Lesen steiht nu an!
Wi freit uns över Schoolklassen, Schöler- oder Kinnergruppen, de uns in de Contrescarpe 32 besöken kaamt! Man nich blots de… uns is jeedeen vun Harten willkamen in`t LzN. Roop an un mell Di mit Dien Grupp oder ok alleen an!